LEGAZPI CITY – Hinali kan Philippine Institute of Volcanology and Seismology an pagkahandal kan publiko sa nagdadakol na nairerehistrong volcanic earthquakes sa palibot kan Bulkang Bulusan.
Kasuodma kan makapagrehistro nin apat na volcanic earthquakes sa palibot kan bulkan mantang kan Miyerkules kan magkaigwa man nin tolong pagyugo.
Segun kay Phivolcs Volcano Monitoring and Erruption Prediction Division head Mariton Bornas sa intrevista kan Bombo Radyo Legazpi na normal sana na magkaigwa nin mga pagyugo sa bulkan huli ta nagtitinir ining aktibo asin nasa alert level 1 pa.
Alagad dae pa man nin nahihiling na paglangkaw kan abnormalidad huli ta nagtitinir na hibaba an nairerehistrong sulfur dioxide emission kaini.
Kawsa an nasabing mga pagyugo kan pagbibitak kan darakulang gapo sa irarom kan bulkan asin dara man kan pressure na nabibilog huli sa hydrothermal system o pag-init kan natitipon na tubig.
Mientras tanto, mahigot man giraray an patanid kan opisyal na ibitaran an paglaog sa 4km permanent danger zone kan Bulkang Bulusan huli ta may posibilidad man giraray na magkaigwa nin phreatic o stream driven erruption anuman na oras.
