LEGAZPI CITY – Nagpatanid an Philippine Institute of Volcanology and Seismology (Phivolcs) manungod sa posibleng huma kan lahar flow sa Bulkang Mayon sa probinsya kan Albay kawsa kan bagyong Querubin asin shearline.
Magigirumduman na nagpaluwas kasuhapon an departamento nin lahar advisory nin huli sa mga warang patod na pag-uran na namamatean sa rehiyon nin huli sa mga raot nin panahon.
Segun kay Phivolcs resident volcanologist Dr. Paul Alanis sa intrevista kan Bombo Radyo Legazpi na base sa saindang latest monitoring, wara man naitala na may nangyaring insidente nin lahar flow sa palibot kan bulkan.
Dae man nakaapektar nin maray an mga pag-uuran na namatean nin huli ta diit sana suboot an ibinuhos na uran sa Albay sa nakalihis na magdamlag.
Pighihiling kaini an mga river channels na harani sa mayon area asin tulos na mapaotob nin evacuation enkaso maglala pa an sitwasyon partikular na sa Misi, Mabinit, Buyuan asin Basud channels sa probinsya.
Pigtaram man ni Alanis na nagpaluwas sana sinda nin advisory nganing magin pagirumdom sa publiko na mag-ingat nin huli ta pwedesir mangyari sa mga masunod na oras an mga dae piglalaoman na mangyari sa palibot kan bulkan.
Pagirumdom kaini sa publiko na nakaistar harani sa river channel sa mayon area na magin rigmat asin alerto sa huma kan lahar asin debree flow kun enkaso magkusog pa an mga namamatean na mga pag-uran.
