LEGAZPI CITY – Magpapadara na an Philippine Institute of Volcanology and Seismology nin mga personahes sa laog kan 6km permanent danger zone ngani na pakarayon an naraot na ekipahes na nagrerehistro kan aktibidad kan Bulkang Mayon.
Sa intrevista kan Bombo Radyo Legazpi kay Dr. Paul Alanis an resident volcanologist kan Philippine Institute of Volcanology and Seismology, maririsa an biglang pagbaba kan nairehistrong rockfall events sa bulkan na nasa 49 na sana harayo sa dating lampas sa 100 kan mga nakalihis na aldaw.
Epekto suboot ini kan pag-offline kan saro sa mga monitoring stations kan ahensya sa Barangay Anoling sa banwaan kan Camalig na nasa taas na parte kan bulkan.
Bako pang malinaw sa ngunyan kung ano an rason kan pagkaraot kaini, alagad posibleng nadanyaran suboot an ekipahes sa estasyon kan mga pag-uran na dara kan Bagyong Egay o posibleng natakloban an mga solar panels kan ash fall.
Sa ngunyan nagbibilog na nin team an Philippine Institute of Volcanology and Seismology na makikipagkoordinar sa lokal na gobyerno asin mga otoridad ngani na makalaog sa danger zone kan bulkan asin mapakaray an ekipahes.
Naglalaom an opisyal na tulos na mapapagana an monitoring station lalo pang importanteng ini sa pagbabantay kan aktibidad kan bulkan.
