LEGAZPI CITY- Tinawan duon kan Philippine Coconut Authority (PCA) na sinda sana an otorisadong ahensya sa pag-isyu nin permit to cut para sa mga nagmamawot na magputol nin niyog.
Susog sa pahayag ni Alvin Trespeces, Division Chief 1 kan PCA Bicol, napag-araman na nagkaigwa nin 3-month moratorium an ahensya o tulong bulan na pag-suspinder sa pag-isyu kan nasambitan na permit huli ta pag-aadalan kaini an presenteng mga patakaran asin regulasyon na saindang ipigpapa-utob.
Base na man suboot ini sa desisyon ni Billy Andal, an administrator kan regional office.
Ineksplikar ni Trespeces na pinag-iisipan kan PCA an pagigin istrikto sa pag-isyu nin mga permit kun kaya sa nasambitan na moratorium na nagpuon kan Enero 3, dae muna sinda mapaluwas nin ano man na otorisasyon apwera na sana sa mga biktima kan nagrapadong bagyong Nina kan Disyembre 25, 2016.
Alagad klinaro kan opisyal na dae makakaputol an siisay man nin maski sarong kahoy, magin biktima man ini kan kalamidad kun wara nin magkakanigong permiso gikan sa saindang opisina.
Katakod man giraray ini kan nagdadakol na kaso nin pagbalgar sa Coconut Preservation Act sa rehiyong Bicol.
