LEGAZPI CITY—Nagpirma nin sarong Memorandum of Agreement an Tabaco City District Jail asin San Jose Community College sa Malilipot Albay mapadapit sa sarong partnership kan college education para sa Persons Deprived of Liberty (PDL) kan nasambitang opisina.
Segun ki Tabaco City District Jail, Jail Warden, Jail City Inspector Ralph Vincent Bobis, sa intrevista kan Bombo Radyo Legazpi, na nagkaigwa sinda nin pag-oolay kan College Administrator na si Atty. Randy Blanza kun saen papangaranan ini bilang College Education Beyond Boundaries.
Pigtaram kaini na magkakaigwa nin initial assessment sa huring semana kan Abril o primerong semana kan Mayo ngunyan na taon para sa mga estudyante sa laog kan kulungan kan saindang city jail.
Magkakaigwa man nin enrollment sa maabot na bulan kan Hulyo.
An nasambitan na programa ipig-orden kan Department of Interior and Local Goverment (DILG) sa Bureau of Jail Management and Penology para magkaigwa nin college education an mga PDL.
Nagmamawot man sinda na dakol pang mga eskwelahan an mag-ofresir nin baccalaureate degree sa mga PDL.
Segun saiya na an ipig-ofresir na college degree kan San Jose Community College iyo an Bachelor of Science in Business Administration (BSBA) Operations Management, asin Secondary Education kun saen iyo an mga ini an saindang nahihiling na akma sa pangangaipo kan mga PDL.
Pigtaram kaini na nasa 28 na mga PDL kan city jail an mawot na magkaigwa nin college education.
Ini dakulang tabang man sa mga PDL ngani na magkaigwa pa sinda nin dugang na kaaraman siring man an makatapos sa pagklase para makahanap sinda nin trabaho.
Dugang pa ni Bobis na sa saindang pasilidad isasagibo an learning program kun saen may pigpreparar man sindang sarong klasrum para sa naunambitang programa.
Mientrastanto, nagpapasalamat man ini sa mga opisyales kan nasambitang eskwelahan na pigtawan nin pagkakataon an mga PDL na magkaigwa nin college education maski yaon sinda sa kulungan.
