LEGAZPI CITY- Pormal nang naresibe kan Philippine Drug Enforcement Agency (PDEA) Regional Office 5 an direktiba ni Presidente Rodrigo Duterte sa paagi kan Executive Order na nagkakaag digdi bilang lead agency kan war on drugs sa presenteng administrasyon epektibo kasuodma, Oktubre 11.
Sa intrevista kan Bombo Radyo Legazpi ki PDEA Bicol spokesperson Cotton Talento, ipigkokonsiderar suboot ninda ining dakulang agyat urog na sa diit na numero kan mga personahes.
Alagad, kumpiyansa si Talento na gigibuhon man giraray kan mga operatiba na gabos na makakaya tangarig na ma-comply an ibinabang kasuguan.
Mientras tanto, hinagad na man kan central office an dugang na mga personahes tangarig na masimbag an nasabing kakulangan kun saen dagos-dagos man an hiring asin training para sa mga bagong agents.
Plano man an pagkakaag nin mga provincial offices para sa mas epektibong operasyon na hasta sa grassroots.
Klinaripikar man kan opisyal na huli sa nasabing kasuguan, dae na kakaipuhanon kan ahensya na mag-isyu nin certificate of coordination sa iba pang mga enforcement agencies durante kan isasagibong mga operasyon.
Sa ibong kaini, bukas man giraray an PDEA sa paghagad nin tabang sa pulisya bilang deterrent kasabay man an police visibility.
Ini na an ikaduwang beses na pinamayuhan kan PDEA an giyera kontra sa iligal na droga puon kan halion ini sa kamot kan pulisya kan nakaaging bulan nin Pebrero.
