LEGAZPI CITY — Ibinuyagyag kan Philippine Charity Sweepstakes Office (PCSO) na matao ini nin medical assistance sa mga evacuees asin mga apektadong pamilya kan pag-aalburuto kan Bulkang Mayon sa Albay.
Segun ki PCSO General Manager Alexander Balutan, nagbaba na ini nin direktiba sa Charity Assistance Department (CAD) na tabangan an mga apektadong residente urog na an mga nasa evacuation centers.
Makikipag-koordinar man an CAD sa mga provincial hospital sa Albay asin iba pang mga ospital para sa tulos na asistensya sa pasyenteng naapektaran kan kalamidad.
Afuera digdi, an PCSO man an masagot sa pagpapaospital kan mga biktima asin matao man nin mga bulong para sa mga evacuees.
Base sa record kan Provincial Disaster Risk Reduction and Management Center kasuodma, nag-abot na sa 36 barangay, 9,291 pamilya, asin 37,739 indibidwal an apektado sa mga ciudad kan Legazpi, Tabaco, Ligao asin mga banwaan kan Daraga, Camalig, Guinobatan, Malilipot asin Sto. Domingo.
Mientras tanto, segun ki Dr. Jose Gochoco Jr., officer-in-charge kan Office of the Assistant General Manager for Charity Sector sa Lung Center of the Philippines sa Quezon City, naipaaram na sa gabos na PCSO branch sa Bicol region an kasuguan ni Balutan na magkasararo sa pagtabang sa mga biktima kan Mayon.
Sa ibong na lado, sinabi ni Albay social worker Charo Loilo na afuera sa portable toilets, wara na mang immediate health assistance na kaipuhan huli sa nasa proseso pa man nin pag-ebakwar an ibang mga residente.
