LEGAZPI CITY-Pinarangalan kan Philippine Coast Guard (PCG) an mga tauhan kan BRP Suluan (MRRV-4406) sa sarong seremonya na pinangenotan ni Admiral Ronnie Gil Gavan sa Pier 15, Port Area, Manila.
An pagbisto kasunod kan saindang matapang na pagganap sa trabaho sa isinagibong Maritime Patrol sa palibot kan Bajo de Masinloc kan Agosto 10, kung sain naibitaran ninda an pagsugod kan Chinese vessels na nagresulta sa pagkabanggaan mismo kan duwang barko kan China.
Segun kay Admiral Gavan, ipinahiling kan mga tauhan an warang kapantay na dedikasyon asin sakripisyo para sa kaligtasan kan mga Pilipinong parasisira sa West Philippine Sea.
Binisto man niya an West Philippine Sea Group huli sa matanos na koordinasyon asin operasyon kan impormasyon sa tahaw kan saindang patrol.
Dagdag pa niya na mamanteniron an pagigin kalmado, propesyonal, asin pagigin matatag kan mga barko sa anupa mang mga hamon.
Magigirumduman na sakay kan BRP Suluan an 43 katawo, kairiba an mga miyembro kan Coast Guard Medical Service, Special Operations Force, Angels of the Sea, asin mga kinatawan kan media.
