Pormal na sinabat ninda Chinese President Xi Jinping asin First Lady Peng Liyuan sinda Presidente Ferdinand “Bongbong” Marcos Jr. asin First Lady Liza Araneta-Marcos sa Shenzhen, China kan Miyerkules nin banggi, katakod kan pag-atendir kan Presidente sa sa 33rd APEC Economic Leaders’ Meeting.
Kasunod kaini, nakisumaro an mag-agom na Marcos sa gala dinner asin cultural presentation kaiba an iba pang mga lider kan APEC asin saindang mga agom. Obheto kan pagtitipon na ipahiling an mayamang kultura asin tradisyon kan China, siring man an pakusugon an pagkasararo kan mga nag-atendir na lider.
Susog sa Presidential Communications Office, nag-abot sa Shenzhen an Presidente asin an saiyang delegasyon pasado alas-5:30 nin hapon, oras sa China.
Nakatalaan mang magsagibo si Marcos nin bilateral meetings ngunyan na Huwebes kaiba sinda Chilean President Jose Antonio Kast, Peruvian President Keiko Fujimori, asin Papua New Guinea Prime Minister James Marape.
An pag-atendir kan Presidente sa APEC meeting an kasunod kan pagho-host kan Pilipinas sa 49th ASEAN Summit and Related Summits kan Nobyembre 15 hanggang 17.
Gigibohon an 33rd APEC Economic Leaders’ Meeting puon Nobyembre 18 hanggang 19, na may temang “Building an Asia-Pacific Community to Prosper Together.”










