Nag-abot na sa Shenzhen Bao’an International Airport sa China sinda Presidente Ferdinand “Bongbong” Marcos Jr. asin First Lady Liza Araneta-Marcos kan Miyerkules nin banggi, Nobyembre 18, nganing mag-atendir sa 33rd Asia-Pacific Economic Cooperation (APEC) Economic Leaders’ Meeting.

Tulos na nag-atendir ini sa sarong gala dinner na susundan nin mga aktibidad asin pag-oolay sa masunod na duwang aldaw.

Kabale sa nakatalaang aktibidad ni Marcos ngunyan na Huwebes ang bilateral meetings kaiba an mga lider kan Peru, Papua New Guinea asin Chile nganing itukar an mga orolay na may kinaaraman sa ekonomiya asin kalakalan.

Segun ki Philippine Ambassador to China Jaime Florcruz, importanteng makisumaro an Pilipinas sa nasabing pag-oolay huli an mga desisyong pigggibo kan mga lider kan APEC member economies an pwedesir magkaigwa nin epekto sa pandaigdigang polisiya, negosyo, presyo asin suplay kan mga produkto.

Posible man suboot itukar sa mga bilateral meeting an orolay sa tariffs o buwis sa sa mga inaangkat asin pigluluwas na produkto, urog na kabale sa mga partisipante an pira sa pinakadarakulang ekonomiya sa kinaban.

Obheto kan APEC Leaders’ Meeting na pakusugon an regional economic cooperation asin pagtatarabang kan mga kasaping ekonomiya sa Asia-Pacific region