Ikinaugma ni Presidente Ferdinand Marcos Jr. an pinal na pagbasura kan impeachment complaint na isinangat laban saiya.
Kan Miyerkules, dagos nang ginadan kan House Justice Panel an reklamo makalihis na maaraman na ini an insufficient in substance.
Inomaw kan Presidente an Kamara de Representantes huli sa episyenteng paggibo kaini kan saindang mga trabaho.
Segun sa Presidente, dae siya nahahandal sa mga reklamo na isinangat laban saiya huli ta wara man nin malinaw asin supisyenteng basehan nganing mahale siya sa pwesto.
Ipinahayag man kaini na personal niyang binasa an laog kan reklamo.
Sa presente, segun sa Presidente, padagos siyang committed sa pagtrabaho para sa karahayan kan nasyon asin pagpagian kan buhay kan mga Pilipino.
Dugang pa kaini na an pagbasura kan mga reklamo sa impeachment an mataong dalan sa gobyerno na magtutok sa pag-implementar kan mga importanteng programa asin proyekto para sa nasyon.
