Ipighayag kan Department of Justice na plano nindang hagadon na maipakansela an pasaporte ni Atty. Harry Roque.
Kun saen balak kan nasabing kagawaran na maisakatuparan ini kasabay kan mga isyung pigkakahampang kan dating presidential spokesperson ni Former President Rodrigo Duterte na presenteng nasa The Netherlands.
Ini mismo an ginibong kumpirmasyon ni Justice Secretary Jesus Crispin Remulla kan mahapot mapadapit sa sitwasyon kan kaso ni Atty. Harry Roque.
An nasabing abogado an presenteng nasa luwas kan Pilipinas partikular nang nasa The Netherlands kun saen nagrani siya sa gobyerno kaini para sa sarong asylum application.
Pigheras man kan kalihim kan Department of Justice na kun enkaso dagos nang makansela an kapot na pasaporte kan dating presidential spokesperson an ikokonsidera siyang ‘undocumented alien’.
Na suboot magkakawsa nin ‘deportation’ kay Atty. Harry Roque asin mapapabalik liwat sa nacion kun saen igwa ining pigkakahampang na mga kaso.
Alagad sa ibong kaini, mahigot man giraray an paninindugan kan lado ni Roque na wara nang magigibo pa an gobyerno nganing arestaron ini.
Pagdoon niya kaya na igwa pa siyang nakabinbin na aplikasyon nin asylum sa nasabing bansa kun kaya dae siya pwedesir basta sana na maipa-deport pabalik nin Pilipinas.
Mientrastanto, pigtuga man ni Justice Secretary Jesus Crispin Remulla na an proseso kan asylum an kinakaipuhan munang matapos bago maarestar o dagos na mapabalik si Atty. Harry Roque.
Alagad pigtawan doon man kaini na dae na mahaloy pa asin posible nang magkaigwa nin finality an asylum application kan nasabing abogado.
Kompyansa kaya si Justice Secretary Remulla na maray asin may due process mang pigbibisto an gobyerno kan The Netherlands na siyang madesisyon mapadapit sa aplikasyong asylum.
Kun kaya magin an Chief State Counsel kan kagawaran na si Arvin Dennis Chan an ipigheras pa na dae pwedesir maaresto an sarong indibidwal mantang pigdadangog pa sana an aplikasyon kan asylum kaini.
Si Atty. Harry Roque an inisyuhan nin arrest warrant kan Angeles City Regional Trial Court mapadapit sa mga kaso kaining pigkakahampang na human trafficking huli sa pagigin imbwelto suboot sa operasyon kan ilegal na POGO.
