LEGAZPI CITY — (Update) Dae na nagawang maisalbar sa kagadanan an sarong paratukdo makalihis na pagsasaksakon kan dae pa nabibistong suspek sa laog kan Oringon Elementary School sa Brgy. Oringon, Pioduran, Albay mantang irido man an duwang Grade 6 pupils kaini.
Binisto an nasabing paratukdo na si Mylene Durante na nahiling na nakahigda asin igwang mga tama nin saksak sa luwas kan principal’s office mantang nahiling na nasa laog kan sarong classroom asin irido sinda Menchie Obrigo, 13-anyos asin Hazel Dela Vega, 12-anyos.
Sa intrevista kan Bombo Radyo Legazpi ki PC/Insp. Joseph Jarabejo, hepe kan Pioduran PNP, nagluluwas suboot sa inisyal na imbestigasyon na nadiskubreng nagkakaturog an mga biktima sa nasabing eskwelahan kan maglaog an dae pa nabibistong suspek.
Nadangog man kan mga estudyante an paratukdo na naghahagad nin tabang kaya nagluwas an mga ini alagad labing pagkakigkig kan mahiling an sarong lalaki na nakatindog sa kataid kan duguang biktima.
Segun pa sa hepe na binalo man kan suspek na saksakon an duwa na nagsapar nin lugad sa manlain-lain na parte kan lawas alagad nagibong makadalagan sa sarong classroom asin nai-lock ini.
Sa presente, nagpapadagos pa an ipigsasagibong imbestigasyon sa nasabing krimen.
