LEGAZPI CITY- Ipigsasairarom ngunyan sa otopsiya an bangkay kan sarong paraoma na biktima nin pambabadil sa Sitio Crossing Brgy. Libertad Cawayan, Masbate.
Susog sa imbestigasyon kan Cawayan Municipal Police Station, guyod kan biktimang si Romeo Baldea, 34-anyos an saiyang baka paluwas kan pastulan na igwa nin rayong 500 metros sa saiyang harong kan bigla na sanang mag-abot an dae nabistong armadong suspetsado.
Bigla na sana ining pinagbabadil sa manlaen-laen na parte kan hawak na nagresulta sa saiyang tulos na pagkagadan.
Nagdulag an suspek sa dae maaraman na direksyon makalihis an ginibong krimen.
Sa ngunyan, nagpapadagos an imbestigasyon kan nasambitan na pulisya para sa pagkabisto asin pagdakop sa suspek.
