LEGAZPI CITY- Dae na nakaabot pang buhay sa ospital an sarong paraoma makalihis na pagbabadilon sa Purok Maligaya Brgy. Poblacion Mandaon, Masbate.
Susog sa imbestigasyon kan Mandaon Municipal Police Station, kakauli lang sa harong kan biktimang si Esmiraldo Miguel, 60-anyos asin ipaparada na an saiyang motor kan biglang mag-abot an duwang riding in tandem suspect asin pinauranan ini nin bala.
Tama nin badil sa manlaen-laen na parte kan hawak an ikinagadan kan nasambitan na biktima.
Pigsasabing personal na dagit asin iwal sa daga an motibo kan mga suspek sa panggagadan na tulos man na nagdulag pasiring sa Brgy. Tumalaytay sa parehong banwaan.
Narekober sa pinangyarihan kan insidente an 12 basyo nin bala para sa shotgun.
