LEGAZPI CITY- Pinagtitigbas sagkod sa magadan an sarong paraoma sa Sitio Cambaliga Barangay Lagta Baleno, Masbate.
Susog sa impormasyon gikan sa Baleno Municipal Police, nabisto an biktimang si Dominador Rapsing, 40-anyos na residente kan Barangay Cagpandan sa parehong banwaan.
Nagluluwas sa imbestigasyon na isinagibo kan pulisya na buyong si Rapsing kan magpasiring sa harong kan suspek na si Gaspar Drio, 33-anyos ngani na agyaton ini nin iwal.
Pigsasabing binalo ni Drio na iwasan an biktima alagad padagos suboot ini sa pang-aagyat saiya.
Digdi na nagkua nin sundang an suspek asin pinagtitigbas an warang laban na biktima sa manlaen-laen na parte kan hawak.// Huli sa mga sinapar na lugad, tulos na binawian nin buhay si Rapsing.
Boluntad man na nagsurindir si Drio sa barangay tanod sa lugar makalihis na magadan an kapwa paraoma.
Sa ngunyan, pighahanda na an kasong isasangat kontra sa nasambitan na suspek.
