LEGAZPI CITY-Nagsagibo nin mosyon an National Bureau of Investigation ngani madagdagan nin panibagong mga ebidensya pati respondents sa reklamong plunder na isinangat kay Sen. Jinggoy Estrada.
Segun mismo kay Justice Spokesperson Atty. Polo Martinez, kasunod ini kan ‘motion to submit additional evidence and respondents’ sa kampo kan ‘complainant’ o kan kawanihan.
Sa nangyaring imbestigasyon mapadapit sa plunder case, ipighayag kan tagapagtaram na dai nagsumiter si Senator Jinggoy kan saiyang kontra-salaysay.
Mantang ipigsugo man kan prosekusyon an NBI na tawan nin kopya an mga respondents kan saindang isasabay na mga dugang na ebidensya sa reklamo.
Afuera kay Senador Jinggoy Estrada, kapareho niyang respondents sina dating Department of Public Works and Highways Secretary Manuel Bonoan, dating Public Works officials Roberto Bernardo, Gerard Opulencia, Henry Alcantara, asin di John/Jane Does.
Kabale man digdi magin an namaaram na si dating Public Works Undersecretary Catalina Cabral, kun sinangatan man nin kaso kan National Bureau of Investigation-Department of Justice Bid-Rigging Task Force.
Partikular man na nahahampang an mga nabanggit na indibidwal sa mga reklamong plunder, pagbayolar sa Section 3(e) kan Republic Act 3019 o an Anti-Graft and Corrupt Practices Act, Receiving Gifts by Public Officers asin Corruption of Public Officers.
Mientrastanto, sinabi kan Justice Spokesperson na dapat magpahiling nin personal an mga ini sa prosekusyon ngani manumpa sa saindang paghampang sa masunod an pagdangog sa Marso.
