LEGAZPI CITY- Liwat na nagkabakbakan an pwersa kan militar asin an rebeldeng grupong New People’s Army (NPA) sa Sitio Dawagan, Brgy. Nagas sa banwaan kan Oas.
Sa pahayag ni Brigadier Gen. Claudio Yucot, commanding officer kan 901st Infantry Brigade kan Philippine Army, napag-araman na naka-engkwentro kan pwersa kan 83rd Infantry Batallion na pinamamayuhan ni First Lieutenant Jinhar Asanol an poco mas o menos 15 myembro kan rebeldeng grupo.
Sampulong minuto an inihaloy kan ribayan nin putok na nagpuon nin alas 7:00 nin aga.
Dae man nin nalugadan sa lado kan militar mantang pigkukumpirmar pa sa lado kan NPA na nagdurulagan na suboot pasiring sa kabuludan.
Mientrastanto, ibinuyagyag man ni Yucot na maabot pa sa 50 an myembro kan NPA sa pinakahuring datos alagad nagpapadagos pa an recruitment operation kan mga ini.
Napag-araman na dakol an rebelde sa nasambitan na lugar na nagpapahayag kan saindang mga propaganda sa mga residente na obheto na maingganyar an mga ini na magbale sa grupo kun kaya nagresponde an mga militar.
Sa ngunyan, nagpapadagos pa an pursuit operation sa lugar kontra sa mga NPA.
