LEGAZPI CITY — Nagtutubod an sarong kongresista na igwang dakulang epekto an ginibong pagsuporta kan mga empleyado kan Supreme Court (SC) sa tulong justices na nangapudan ki Chief Justice Maria Lourdes Sereno sa indefinite leave kaini.
Sa intrevista kan Bombo Radyo Legazpi ki Ako Bikol partylist Rep. Alfredo ‘Pido’ Garbin Jr., kadaklan sa mga miyembro kan SC an wara nang kumpiyansa sa punong mahistrado.
Dugang pa kan opisyal na makakatabang ini pagsasagibo nin desisyon kan miyembro senado dapit sa kun igwa pang poder si Sereno sa pamamayo sa korte suprema.
An nasambitan na lakdang man kan mga empleyado kan SC an patunay sana suboot na igwang problema ki Sereno huli ta ini an pina enot na bes na magin an mga nasasakupan na empleyado an ipigpapangapudan an pagbaba sa pwesto kan sarong chief justice.
Segun pa ki Garbin, iba ini sa nangyari kan panahon ni dating Chief justice Renato Corona na sinuportaran kan mga empleyado kan judiciary hasta sa huri.
Mientrastanto, nagkaigwa na man nin bicameral conference committee an mga kongresista ngani na mapakarahay an probisyon kan house asin senate version dapit sa Anti Hazing Act of 2018.
En kaso man suboot na mapirmahan ini ni Presidente Rodrigo Duterte antes an saindang lenten break, magigin panibagong honra nanaman ini para sa AKB.
