LEGAZPI CITY—Naghahagad nin hustisya an pamilya kan 82-anyos na lola na kinua an lawas sa saiyang kabaong sa Sto. Domingo Public Cemetery sa banwaan kan Sto. Domingo Albay.
Kun magigiromdoman na naaraman kan sarong sepultorero kan sementeryo na wara na an lawas kan biktima sa saiyang kabaong.
Segun sa aki kan biktima na si Anna Leah Balbin, sa intrevista kan Bombo Radyo Legazpi, na kan saindang naaraman an insidente tulos sindang nagpasiring sa sementeryo kun saen nahiling ninda na bukas na an kabaong kan biktima asin wara digdi an saiyang lawas.
Dugang kaini na nasa ikatulong apartment kan lubungan nakabugtak an kabaong kan saiyang ina.
Nakua an lawas kaini na may rayong 100-metro gikan sa lubungan kun saen nakasubsob ini sa daga asin wara na nin diaper.
Posible man suboot na kinaladkad an biktima huli ta an saiyang buhok an nagkatarangkas sa halangkaw na pigpwestuhan kan saiyang kabaong, na kun saen may pigtatangkas man na mga hibla kan buhok an mga kapulisan.
An diaper asin underwear kan biktima an nahiling man sa sarong gilid kan lubungan.
Igwa man suboot an biktima nin mga lugad sa pandok asin nagkapirang parte kan saiyang lawas.
Sa ngunyan padagos an saindang pakikipagkoordinar sa mga otoridad para sa imbestigasyon kan insidente.
Mientrastanto, nangapudan man ini sa kun siisay man an nakahiling o nakamidbid sa suspetsado na makipagkoordinar para maresolbar an nasambitang insidente.
