LEGAZPI CITY — Nakapinto pa an dakol na impormasyon asin abangan suboot an iba pang kasong pigbibilog katakod kan panggagadan ki Ako Bicol Party-list Representative Rodel Batocabe.
Ini an nagin pahayag kan nagkapirang miembro kan pamilya makalihis na mapag-araman na nagsunad nin kasong conduct prejudicial to the best interest of service asin graft and corruption an PNP Criminal Investigation and Detection Group (CIDG), kontra ki incumbent Daraga Mayor Carlwyn Baldo na suboot “mastermind” sa krimen.
Sa intrevista kan Bombo Radyo Legazpi ki Atty. Justin Batocabe, matuang aki kan ginadan na lehislador, pinasalamatan kaini an pulisya sa mga lakdang alagad nagtutubod na hirarom pa an ugat kan problema sa banwaan asin dakol pang dapat madiskubre.
Segun ki Atty. Justin na sa eksperyensya bilang sarong abogado, nahiling suboot kaini na magayon an dalagan kan istorya kan mga testigo asin co-conspirators mantang tugma man an mga testimonya na posibleng maitakod sa katotoohan.
Sa ibong na lado, aram man kan joven na Batocabe na nagpapadagos pa an imbestigasyon kaya pakiolay na pag-isipan asin dae paghidalion an proseso mantang ipigpapasakamot naman sa korte an pag-appreciar sa mga ipi-presentar na ebidensya.
Magigirumduman na Disyembre 22 kan nakaaging taon kan pagbabadilon-gadan si Batocabe asin police escort kaini makalihis an Christmas gift-giving event sa Daraga na ikinairido man kan nagkapira pang senior citizens.
