LEGAPI CITY- Nanindugan an pamilya kan nagadan na si AKO Bicol Party List Representative Rodel Batocabe na idadagos ninda an laban sa maabot na 2019 midterm elections.
Sa sarong press briefing ipighayag ni Atty. Justin Batocabe, an matuang aki kan nagadan na kongresista, na pinag-iisipan na kung sisay sa miyembro kan saindang pamilya an madalagan bilang alkalde sa banwaan kan Daraga.
Napag-araman na nakatalaan kutang magdalagan bilang alkalde sa nasabing banwaan si Cong. Batocabe antes ining pagbabadilon sa barangay Burgos.
Segun kay Atty. Justin, nakatutok muna an saindang pamilya sa mga preparasyon para sa pagpapalubing sa kongresista na nakaburol ngunyan sa Arcilla hall kan Bicol University College of Social Sciences and Philosophy sa Daraga, Albay.
Mientras tanto, kinumpirmar man ni Justin na dae na idadagos pa an plano kutang paglipat sa hawak kan kongresista sa Manila para sa sarong memorial service.
