LEGAZPI CITY — Pagbabalos an pighihiling na motibo kan mga kapulisan sa pambabadil-gadan sa sarong parasira sa banwaan kan Balud sa Masbate.
Mga miyembro kan New People’s Army (NPA) an pigtutubudang nasa likod kan krimen na mawot suboot magbalos huli sa pagkakaimbwelto kan biktima sa mga insidente nin panghahabas sa Brgy Panguiranan asin kataraid na barangay.
Segun sa tugang kan biktima na si Lesly Sese, sarong bulan antes an insidente, nakaresibe siya nin apod hale sa dae bistong persona kun saen sinabing gagadanon an saiyang tugang na si Emeliano Suicon Jr, 41 anyos asin residente kan Sitio Olivia, Brgy Panguiranan.
Sa ikinondusir na imbestigasyon kan Balud Municipal Police sa pangengenotan ni P/Insp. Ralph Llegado, napag-araman na pauli na an biktima hale sa paghiling nin pelikula kan biglang nagrane an dae pa bistong mga suspek.
Bigla na sanang pinagbabadil an biktima kan duwang armadong kalalakihan na nagresulta sa tulos na pagkagadan kaini.
Segun man ki Llegado, pigkukumpirmar pa ninda ngunyan kun talagang miyembro kan rebeldeng grupo an duwang lalaki na nasa likod kan nasabing pambabadil.
