LEGAZPI CITY – Padagos an pagbeberipika kan Catanduanes Provincial Disaster Risk Reduction and Management Office mapadapit sa mga insidente nin pagrasay nin daga huli sa magdamlagang pag-uuran.
Segun ki Catanduanes PDRRMO Emergency Operations Section Chief Roberto Monterola sa intrevista kan Bombo Radyo Legazpi na basado sa saindang impormasyon an nangyari an insidente sa P. Vera Summit na nagkokonektar sa mga banwaan kan Viga asin Virac.
Nakikipagkoordinar na man sinda nin Department of Public Works and Higways nganing tulos na makapagsagibo nin clearing operation.
Paglilinaw niya man na may iba pang agihan nganing makalaog asin makaluwas sa banwaan kan Viga alagad kakaipuhanon pa suboot na maglibot asin magtagama pa nin pirang oras para sa pagbyahe.
Pigkokonsidera man kan opisyal na sarong major landslide an nangyari huli ta idineklarang unpassable an naapektarang tinampo asin kinakaipuhan nin heavy equipment para sa clearing operation.
Wara man suboot sindang nairehistrong casualty sa nangyaring pagrasay nin daga sa saindang provincia.
Pagirumdom ni Monterola sa mga motorista asin namamanwaan na dae muna magpirit sa mga tinampong apektado kan mga landslide nganing malikayan an dae piglalaomang insidente.
