LEGAZPI CITY – Ipigbubusol sa Sangguniang Panglungsod ng Legazpi an pagkakaag nin “Parada Free Hour” para sa mga tricycle drivers kan ibang TODA.
Susog sa nasabing lakdang, tutugutan nang magpila an sarong tricycle sa ibang parada urog na sa mga oras na alas-6:00 nin banggi hasta alas-6:00 nin aga.
Sa intrevista kan Bombo Radyo Legazpi ki SP Legazpi Committee on Public Order and Safety chairman Coun. Al Barizo, mawot na ipaotob an ordinansa huli sa mga reklamo na dakol an wara nang nasasakyan pauli durante kan mga nasabing oras.
Wara na kayang nakapilang legal na tricycle sa paradahan na designado para sa mga ini, lalo na kun naka-boundary na asin nag-uruli naman.
Segun ki Barizo, mas maray kun magtatarabangan na sana kun kaya ngani na dai mabayular an eksistidong franchise ordinance na bawal pumila sa ibang parada, ipigmumuknang ipasar an “zona libre”.
Kakaganan man nin penalty clause an ordinansa kun sasayumahan an pagpapila sa mga non-members kan TODA siring man sa mga magsasakay nin pasahero na dai nagpipila.
Tapos naman an public hearing kan Huwebes asin sa Lunes, Enero 18 ipapasa an napag-olayan sa session para sa second reading.
Naglalaom man an konsehal na sa tabang kan ipigtutulod na ordinansa, magigin epektibo an pagdakop sa mga naghahahabal-habal asin colorum.
