LEGAZPI CITY — Naging sentro kan pag-oolay kan Albay Public Safety and Emergency Management Office (APSEMO) asin ni Albay Gov. Al Francis Bichara an pagpapakusog kan traffic enforcement sa probinsya.
Iniheras kan pamayo kan APSEMO na si Dr. Cedric Daep na kaipuhan na magkaigwa na nin deployment na ma-stand by sa mga critical point areas ngane na may mga maresponde tulos enkasong magkaigwa nin aksidente sa sarong lugar.
An plano suboot na ini an kinakaipuhan nin dakulang kantidad nin kwarta para sa mga ekipahes kun kaya kaipuhan ki foreign assistance ngane na mautob an lakdang.
Natukar man suboot an pag-establisyar kan structure kan traffic enforcement kun saen kinakaipuhan na igwang operational asin administrative enforcement.
Ini ngane na mapakusog an pwersa kan enforcer sa enterong probinsya asin maibitaran an over-crowding asin mga pagbalgar sa tinampo.
Iaaplay an nasabing preventive measure ngane man maibitaran an mga aksidente sa tinampo.
Apwera kaini, pigpa-plano man kan APSEMO na magkaigwa nin hotline number.
Alagad kaipuhan pa suboot na makipag-olay nin personal sa mga telecommunication companies ngane na maplano asin ma-estimate na kun pano isasagibo an plano asin matawan na nin magkakanigong paagi.
