LEGAZPI CITY – Nagpapadagos an monitoring kan mga otoridad sa pagmamantenir kan kalinigan asin kaayusan kan kapalibutan sa ciudad kan Legazpi pirang aldaw antes an kapaskuhan asin bagong taon.
Segun ki Task Force Kalinigan at Kaayusan Head Mark Andy Marbella sa intrevista kan Bombo Radyo Legazpi na nakikipagtabangan sinda sa Office of the City Environment and Natural Resources para sa pagkolekta kan mga basura pasiring sa dumpsite.
Tututukan man ninda an biglaang pagdakol kan volume kan mga basura na pwedesir magtambak sa mga pampublikong pasyaran asin sa mga Material Recovery Facility kan mga barangay.
Dapat man suboot na magkusa na an mga paratienda sa paagi kan pagkuwa nin permit to dump asin sinda na an matapok kan saindang mga basura sa designadong lugar kaysa sa halaton an mga garbage collectors na kuwaon an mga ini.
Dugang pa kan opisyal na afuera sa kalinigan an pigtatawan man nin aksyon kan saindang ofisina an mapadapit sa balagaw-bagaw na mga badjao sa ciudad na nagtataong peligro sa publiko.
Pagsyerto niya man na dae mapundo an saindang pagpatrolya sa mga kakalsadahan nganing sawayon an mga badjao asin mamantenir an katuninongan sa ciudad.
Pagirumdom ni Marbella sa publiko na sanayon an saindang sadiri mapadapit sa tamang pag-segregate kan basura nganing dae na mapagalan an mga garbage collectors mantang ibitaran an pagtatao nin kwarta sa mga badjao na namamalimos nganing dae man ini masanay.
