LEGAZPI CITY- Nilinaw ngunyan kan Land Transportation Franchising and Regulatory Board (LTFRB) Bicol na bako pa epektibo an dagdag singil sa pamasahe kan mga public utility vehicles.
Ini maski pa aprubado na an kahagadan na dagdag pamasahe.
Segun ki LTFRB Bicol Director Joel Defeo sa intrevista kan Bombo Radyo Legazpi na kinakaipuhan pang halaton an ipapaluwas na memorandum circular.
Dugang pa kan opisyal na kinakaipuhan muna na mag-secure nin fare matrix hali sa ahensya ngani na magin basehan kan implementasyon.
Tinawan duon ni Defeo na an pagpapaotob na kan mas halangkaw na singil sa pamasahe na wara pang approval an ahensya an nangangahulugan nin sarong bayolasyon na posibleng magresulta sa kanselasyon nin prangkisa.
Paliwanag kaini na maski maglangkaw an presyo kan langis, bako man otomatiko an paglangkaw kan pamasahe huli ta regulated ini kan gobierno.
Segun pa ki Defeo na kinakaipuhan man na tukaron kan board kun papano babalansehon an epekto sa mga operators asin commuters siring man sa pang kabilugan na ekonomiya.
Inenganyar man kan opisyal an publiko na magsumbong sa ahensya enkasong igwa na nin mga drivers na nagsasamantala sa paglangkaw kan pamasahe
