LEGAZPI CITY-Pinakusog pa kan Cybercrime Investigation and Coordinating Center (CICC) an kampanya ngani mapuksa an local gaming na ‘online sabong’ bilang parte kan pinahiwas na pag-crackdown sa cybercrime platforms.
An lakdang kan CICC, ipigpaotob sa tahaw kan pangapudan kan publiko kasunod kan viral video na nagpapahihiling kan sarong mambabatas na nagagamit kan mobile phone asin nagiintra sa online gaming mantang nasa opening session kan House of Representatives.
Enot naman na nagluwas an ladawan kan mambabatas na nagkakwat asin naghihiling kan online sabong mantang nasa sesyon.
Pigako man kan kongresista na dai siya nagtataya alagad naghihiling sana siya gamit an saiyang cellphone.
Kinumpirma man ni Deputy executive Director Atty. Renato Paraiso, misyon kan saindang ahensiya na wakasan an off-grid cockfighting matches, na nagtetenir na peligro sa cybersecurity asin social fabric kan nacion.
Piglinaw man kan ahensiya na bako toal ban an solusyon sa online gambling platforms alagad ipapauswag an mahigot na regulasyon, transparency asin accountability.
Pighikayat man kan opisyal an mga mambabatas asin regulator na matabangan sa pagbilog kan sarong balanseng legal framework na magpadusa sa illegal actors na dai nakokompromiso an inobasyon sa digital entertainment asin financial technology.
