LEGAZPI CITY – Padagos an pangapudan nin tabang kan mga magurang, maestra, asin lokal na opisyal kan banwaan kan Rapu-Rapu para sa pagko-konstruhir kan library sa laog kan campus sa central school sa nasambitan na banwaan na pinagtutubudan na magigin dakulang katabangan para sa mga kaakian.
Nagpadara na man nin joint resolution ki Albay second district Rep. Jose Salceda an GPTA kan eskwelahan asin an Sangguniang Barangay kan Poblacion para sa kinakaipuhan na pondo sa proyekto.
An Barangay Poblacion an saro sa 34 barangay sa isla kan Rapu-Rapu kun sain pigkakarkulong maabot sa 75 percent kan populasyon an aki nin mga parasisira.
Nagtutubod man an kapitan kan nasambitan na barangay na si Erick de la Cruz na an library an makakapaghatod nin positinong resulta sa mga estudyante urog na ngunyan na nairehistro an hibabang enrollment sa eskwelahan sa nakalihis na duwang taon.
