LEGAZPI CITY – Nakahangos nin halawig si Albay 1st district Rep. Edcel Lagman kasunod kan pag-anunsyar ni Presidente Rodrigo Duterte kan pagbubuwag kan gabos na Philippine National Police (PNP) anti-drug units siring man an madugong “Oplan Tokhang” operations.
Segun ki Lagman, sarong blessing suboot an pagbuwag kan Anti-Illegal Drugs Group (AIDG) asin war on drugs susog sa kasuguan ni Duterte sa tahaw kan panggagadan ki Korean Jee Ick-Joo.
Ipigduon pa kaini na an nasabing lakdang an mapundo sa extrajudicial killings kan mga drug suspects mantang nagsasairarom sa cleansing o paglilinig an mga police scalawags.
Dugang ni Lagman, kun may mapo-probaran man suboot sa pangingidnap asin panggagadan ki Jee, iyo an igwa nin ‘mamamatay-tao’ sa PNP na kaipuhang panimbagon imbes na magpadagos sa pagpapautob kan kampanya laban sa droga.
