LEGAZPI CITY – Padagos pa man an ipigsasagibong Search and Rescue operation para sa nawawarang parasisira na si Joseph Gonzales sa Brgy. Danao, Baras, Catanduanes.
Segun ki Provincial Disaster Risk Reduction and Management Office Catanduanes Emergency Operations Chief Roberto Monterola sa intrevista kan Bombo Radyo Legazpi na naggamit na sinda nin aerial asset nganing mas mapadali an paghahanap sa nawawarang indibidwal.
Duwang eroplano na suboot an saindang ginamit sa paghanap alagad dae talaga nahiling si Gonzales siring man an mga parasisira na naglalawod man sa kadagatan an wara man nahiling maski palatandaan.
Basado man sa saiyang pakikipag-olay sa mga residentes an napag-araman ninda na may convoy an sarong grupo na kinababalehan kan biktima alagad kan mag-uran suboot asin nag-zero visibility an biglang nawara ini asin dae na aram kun nagsain.
Pigtaram pa kan opisyal na susog man sa saindang report an bako man 100 percent na parasisira si Gonzales huli ta aircon technician an saiyang trabaho asin posibleng nag-iba sana sa paglawod kun kaya naligaw ini asin dae na aram kun sain na direksyon.
Naglalaom sinda na mahanap na buhay pa an biktima sa ibong kan hababa na tyansa base man sa mga dating insidenteng nairehistro.
Pagirumdom ni Monterola sa publiko na magdangog sa mga abiso kan mga otoridad urog nang nagdadangadang na sa kadagaan kan Pilipinas si bagyong Nando asin dae na muna maglawod nganing dae man mabugtak sa peligro an saindang mga buhay.
