LEGAZPI CITY-Pinaiimbestigaran na kan Department of Environment and Natural Resources (DENR) an nangyaring pagguho sa Green Leap Sanitary Landfill sa Barangay San Isidro, Rodriguez, Rizal kan Pebrero 20, 2026.
Kun sain nasa 3 obrero an naenot nang pig-report na nawawara asin ngonian nahanap na mantang padagos na nagpaparhay sa ospital.
Segun sa ahensya, tulos sindang nagpadara nin mga tawohan hale sa Environmental Management Bureau – Calabarzon ngani mabusisi an kabilugang danyos sa lugar.
Ipigsugo man ninda an Green Leap Solid Waste Management, Inc. na magsagibo nin slope stabilization operations asin magsangat nin detalyadong action plan.
Pinagbawalan an paggamit kan magagabat na gamit sa mga high-risk zones ngani maibitaran an kaparehong insidente.
Nangangapudan man si Rizal Governor Nina Ricci Ynares nin mas hararom na imbestigasyon huli sa pagkahadit kan mga residente asin grupo sa saindang kaligtasan asin epekto sa kapalibutan.
Pigsierto man kan ahensya na padagos nindang babantayan an lugar asin ipapaotob an mga lakdang para sa rehabilitasyon asin kaligtasan kan publiko.
