LEGAZPI CITY- Nakahangos na suboot nin diit an Pamilya Batocabe asin nagkapira pang suportadores kan ginadan na lehislador na si Ako Bicol Party-list Representative Rodel Batocabe makalihis an pagbisita ni Presidente Rodrigo Duterte kasubanggi kasabay kan asegurasyon nin pagtataong-hustisya sa sinapar kan opisyal.
Sa intrevista kan Bombo Radyo Legazpi ki Ako Bicol Party-list Representative Alfredo Garbin Jr., kinondenar kan presidente an nangyari mantang ipigduon na dae nunca maging kaako-ako an pagpapagadan kan sarong politiko nin saro pang kandidato, tangarig sana manggana.
Nagtutubod man si Garbin na bako sana an paninindogan kan pamilya na posibleng politically-motivated an nangyari an nagin rason sa paghuma kan presidente sa sarong ipigtutukdong local government official bilang “mastermind” alagad suportado man kan mga impormasyon hale sa investigating body.
Naglalaom man an kongresista na makakatabang sa pagbulong sa namamateang kadificilan kan Pamilya Batocabe an suporta kan presidente.
Dugang pa ni Garbin na ipinagsugo naman kan presidente ki Police Chief Director General Oscar Albayalde an pagdis-arma sa mga private armed groups (PAGs) sa Albay urog na sa munisipyo kan Daraga.
