LEGAZPI CITY — Nakadisignar na sa manlaen-laen na parte kan rehiyong Bicol an 31 motorist assistance centers na parte kan Oplan Lakbay-Alalay na taunang ipiglulunsar kan Department of Public Works and Highways (DPWH.)
Katabang kan nasambitan na ahensya an Land Transportation Office (LTO), Philippine National Police (PNP) asin iba pang concerned agencies ngani na magsirbeng giya sa mga motorista asin commuters na piglalaoman na maruso sa rehiyon gikan sa Manila asin mga probinsya.
Sa intribista kan Bombo Radyo Legazpi ki Lucy Castañeda, tagapagtaram kan DPWH Bicol, “worry-free” an mga bakasyonista huli ta nakalatag an mga assistance centers kan departamento bako sana sa Bicol alagad sa bilog na nasyun.
Igwa suboot nin mga mekaniko, equipment operators, engineers asin maintenance workers na 24-oras na maantabay ngani na mag-opresir nin tabang kun in kaso magkaigwa nin problema an mga motorista.
Sarong semanang matao nin serbisyo an Lakbay-Alalay kan DPWH na matatapos sa Abril 17.
Liwat man na nagpagirumdom si Castañeda sa gabos na contractors asin engineers na may ongoing road construction project na siertuhon na kumpleto an warning signs installation base na man sa memorandum na ipinaluwas ni mismong DPWH Secretary Mark Villar.
