LEGAZPI CITY- (Update) Inasegurar kan Philippine Institute of Volcanology and Seismology an mahigot na pagbabantay sa mga volcanic activities kan Mt. Mayon sa Albay katakod kan mga naoobserbaran na abnormalidad.
Sa ekslusibong intrevista kan Bombo Radyo Legazpi ki Phivolcs Dir. Renato Solidum, hinale kaini an pagkahandal kan publiko asin sinabing haloy naman kayang nakabandera sa nasabing bulkang ang Alert Level 1 status kaya padagos an paghuhubag asin paminsan-minsang mga volcanic earthquakes.
Nahihiling man suboot an pressure sa laog kan bulkan sa pagbabawas kan lebel kan mga water sources na harani digdi.
Dae man pighahale ni Dir. Solidum na huli sa local faults an nagkapira sa mga pagyugo kun saen nasa 25 volcanic earthquakes an nairehistro sa latest volcano bulletin.
Enot naman na naibareta na pinag-aadalan na kan ahensya ang pagbaba kan bulkan sa normal na lebel alagad segun ki Solidum, dae pa kinakaipuhan an nasabing lakdang sa ngonian urog na sa mga ipigpapahiling na aktibidad kan Mayon.
Tutok man an monitoring sa Mayon sa numero kan linog, pagsakat kan volume kan buga kan asupre asin paghubag na magiging basehan kun isasakat man an lebel kaini sa tabang kan mga modernong ekipahe na nakabantay sa bulkan.
