LEGAZPI CITY- Direktang sinimbag kan mga finalists sa search para sa Ten Outstanding Bicolano Students an mapadapit sa nagkapirang maiinit na isyung pan-sosyudad na obhetong masolusyunan an mga problema sa nasyun.
Nagpahayag nin pagkontra an mga estudyante kan mahapot kan mga miyembro kan lokal na media an isyu kan pagpapababa kan edad sa criminal liability gikan sa 15-anyos na magigin 9-anyos na sana.
Tinawang duon ni Cristia Shiena Amparo, graduating student kan Bachelor of Science in Secondary Education gikan sa University of Nueva Caceres (UNC) sa Naga City na ‘harsh’ para sa mga aki an ipigbubusol na House Bill 2 o an “Minimum Age of Criminal Responsibility Act” ni House Speaker Pantaleon Alvarez.
Kasabay pa sa mga natukar na isyu sa nasambitan na pagtiripon an mapadapit sa pagbuhay sa ley na masentensya nin padusang kagadanan, pagbariwas nin mga condom sa mga eskwelahan ngane na mabawasan an naglalangkaw na numero kan teenage pregnancy asin an pagbabago sa klase nin gobyerno sa Federal system.
Nagsasairarom sa mahigot na pag-evaluate kan Commission on Higher Education (CHED) asin AKO BICOL Partylist representatives an mga nasambitan na representantes gikan sa manlaen-laen na pribado asin pampublikong kolehiyo asin unibersidad sa enterong rehiyong Bicol.
Bukas an TOSB sa gabos na estudyanteng Bicolano sa higher education institutions na nagpahiling nin urag sa scholarship, leadership asin service.
