LEGAZPI CITY — (Update) Nasa salbado nang kamugtakan sa presente an gabos na lunad kan private aircraft na nag-emergency landing kasubagong udto sa Bicol International Airport sa Brgy. Alobo, Daraga, Albay.
Sa intrevista kan Bombo Radyo Legazpi ki P/Supt. El Cid Roldan, hepe kan Daraga Municipal Police, dae pa suboot maray nakakaolay an mga ini na napag-araman na hale pa sa Pasay City sa Metro Manila asin pigtutubudang mga bisita gikan sa Central Bank.
Dugang pa kan opisyal na limitado man an ipigpapaluwas na impormasyon kan mga ini na haros sarong hapot, sarong simbag sana man.
Nairehistro man an partial damage sa walang pakpak kan eroplano katakod kan pagsadsad mantang napano nin dugi an ibabang parte kaini.
Nagtutubod man an hepe na posibleng huli sa makusog na duros an nasabing insidente.
Mientras tanto, nagbiyahe naman an apat na pasahero pasiring sa Legazpi City mantang nawalat sa area an duwang piloto asin sarong crew para sa ipigsasagibong imbestigasyon.
Nahiling man an pagbaba kan nagkapirang karton kan mga dokumento na enot nang pigpensar na laog an mga kwarta.
Sa presente, nakipagkoordinar na man an mga piloto sa main office kan mga ini tangarig na maghagad nin tabang urog na piglalaomang padificilan an paghale kan eroplano sa dugi kun dae guguyudon kan heavy equipment.
