LEGAZPI CITY- Dagos-dagos an pagtatao nin scholarship kan Technical Education and Skills Development Authority (TESDA) para sa mga mawot na magsairarom sa skills training asin makakua nin certification.
Segun ki Rose Perida an Information Officer kan TESDA Bicol, nakalatag pa man giraray an P46 million na fondo para sa ongoing 5, 788 TESDA scholars sa bilog na rehiyon Bicol.
Apwera pa kaini, madudugangan pa suboot ini nin P74 million pesos na mareresibe kan mga ma-enroll sa mga TESDA-registered institutions ngonian na taon.
Pag-eksplikar pa ni Perida na bako arog sa regular na eskwelahan na may semestral break, an training na ipigtatao kan ahensya an may year round implementation kun saen sa kada pagtapos kan program an may duwang semana sanang pahingalo asin balik na tulos.
Mismong an pamayo kan ahensya na si Sec. Gulling Mamondiong an nagpadara nin surat sa kada baranggay nganing engganyaron an mga ini na maglaog sa TESDA courses asin mag-acquire nin skills training asin national certification (NC).
Mientrastanto, klinaro man kaini an dapit sa mga dae pa nag-aabot na kit para sa Special Training for Employment Program (STEP).
Aminado si Perida na may delay talaga sa pagtatao kaini huli ta gikan pa sa central office an gamit.
Naka-classify man an nasambit na tool depende sa tinapusan na program kan scholar.
