LEGAZPI CITY – Nakompiska kan Philippine Drug Enforcement Agency an pigkakarkulong P74.8 Million na kantidad kan pigtutubudang shabu sa isinagibong major anti drug operation sa Matnog Port sa provincia kan Sorsogon.
Segun ki PDEA Bicol Spokesperson Carlo Fernandez sa intrevista kan Bombo Radyo Legazpi na nakipagkoordinar asin nakipagtabangan sainda an Philippine Drug Enforcement Agency-National Capital Region (PDEA NCR), Philippine Coast Guard, Philippine Ports Authority, Philippine National Police, Philippine Army, asin Inter-Agency Illicit Drug Interdiction Task Group (IIDITG) Sorsogon nganing maisakatupadan an nasabing operasyon.
Dakop man sa operasyon an duwang indibidwal na binistong sinda alyas Jam, 34 anyos, asin si Alias Sal, 19 anyos na parehong sakay kan Toyota Hilux kun sain nadiskubre an mga nasabing kontrabando.
Antes makalog sa nasabing pantalan an pinapundo suboot kan saindang Interdiction Unit an nasabing behikulo para sa sarong inspeksyon asin digdi na tuminambad an 11 vacuum-sealed plastic bags na may label na “Very Good” pigtutubudang naglalaog nin methamphetamine hydrochloride, kasabay an iba pang paraphernalia.
Pigtaram pa kan opisyal na ini na an pinakadakulang kantidad kan ilegal na droga na nasabat kan saindang ofisina sa enterong rehiyon ngonian na 2025.
Pagdoon niya man na pirang aldaw ninda pinagplanuhan an nasabing joint seaport interdiction operation huli ta hale pa sa saindang national counterpart an impormasyon kun kaya nauugma sinda na nadakop an mga maporbar na maglaog kaini sa rehiyon na warang na-iirido sa saindang mga personahes.
Suspetsya man ninda na mapasiring kuta an mga suspetsado sa may parteng Visayas o Mindanao huli ta napag-araman ninda na taga-Lanao Del Sur an saro sa mga nakasakay asin nag-agi sana sa nasabing pantalan nganing magbagsak nin kontrabando.
Sa presente, pighayag pa ni Fernandez na dadarahon an mga nakumpiskang ilegal na droga sa laboratory para sa confirmatory testing asin naka-hold sa saindang ofisina an duwang nadakop na persona sagkod sa masunadan nin kaso.
