LEGAZPI CITY—Nakumpiskar sa sarong indibidwal an maabot sa P57,120 na kantidad nin pigtutubudang shabu sa ikinundusir na buy-bust operation sa Barangay Cormidal, Tabaco City.
Naarestar an suspek na pigbistong si alyas “Padi” sa pinagsarong operatiba kan Tabaco City Police Station City Drug Enforcement Unit, Philippine Drug Enforcement Agency Regional Office 5 asin Albay Maritime Police Station.
Basado sa inisyal na report, nagpabakal an suspek nin sarong medium heat-sealed plastic sachet na may laog na pigtutubudang shabu sa sarong poseur buyer sa kantidad nin P2,500 asin may kaiba na sarong P500 bill magin duwang P1,000 bill na boodle money.
Afuera digdi, nakumpiskar man sa suspek an duwa pang pakete nin pigtutubudang shabu.
Maabot sa 8.4 gramos an gabat na nakumpiskar na pigtutubudang shabu kun saen may may street value ini na P57,120.
Sa presente nasa kustodiya kan Tabaco CPS an suspek para sa magkakanigong disposisyon asin posibleng mahampang sa kasong pagbalgar sa Republic Act 9165 o Comprehensive Dangerous Drugs Act of 2002.
