LEGAZPI CITY – Itinurn-over na suboot ni Presidente Rodrigo Duterte sa pulisya an ipigtangrong P20 million reward money sa siisay man na makakapagtukdo sa utak kan panggagadan ki Ako Bicol Party-list Representative Rodel Batocabe.
Magigirumduman na inanunciar kan presidente an pagdonar kan nasabing reward money kasabay kan nagin pagbisita kaito sa nakaburol pang lehislador.
Sinabi ni Atty. Justin Batocabe sa intrevista kan Bombo Radyo Legazpi na sa saiyang pagkakaaram, nangyari ini kasabay kan pakikipaghampang kan presidente sa mga testigo sa kaso na suboot gagamiton tangarig na mai-secure an nagsurendir na personalidad asin pamilya kaini.
Liwat na ipigduon kan matuang aki kan lehislador na an ‘least guilty’ an makakaresibe kan bounty mantang kinumpirmar na posibleng dakulang porsyento kaini an mapapaduman ki Emmanuel Judavar na primary witness sa kaso.
Mientras tanto, nilinaw man ni Atty. Justin na itatagama sa mga bagong maluwas na testigo an natatadang P30 million hale sa AKB, Albay provincial government asin Kamara.
Kun sa mga suspek naman, itatao sana suboot ini kun igwa nang mako-convict sa kaso na magsisirbing ebidensya na totoo an mga binutasang testimonya alagad dae nunca na mapapasakamot kan mga ipigtutukdong gunmen na sinda Henry Yuson asin Rolando Arimado.
