LEGAZPI CITY — Liwat na pinahalawig pa kan Bangko Sentral ng Pilipinas (BSP) an deadline sa pagribay kan mga lumang serye nin kwarta.
Magigirumduman na nakatalaan na kuta ini kan Marso 31 alagad ginibong Hunyo 30.
Ineksplikar ni Marlyn Paje, Deputy Director kan BSP na huli ini sa public clamour o kahagadan kan publiko na tawanan pa sinda nin urog na halawig na panahon ngani na maiparibay an mga nasasaray nindang old banknotes.
Dugang pa ni Paje, dae man nin mababago sa proseso kaini kun sain pwedesir na magpasiring sa mga bangko o direkta sa bangko sentral an siisay man na may ipapabalyong kwarta.
Para man suboot sa mga OFW, itinalaan kan Marso 31 an deadline para sa pagregister online sa orbs.gov.ph alagad pwedesir sindang makaribay sagkod sa Disyembre 31 ngunyan na taon.
Sigon pa sa opisyal, nasa 2% na sana kan 8.6% an saindang piglalaoman na mariribay o nagkakantidad nin P19.2 billion sa P979.9 billion.
An lakdang na ini kan BSP an katakod kan saindang demonetization process na enot na inilunsar kan 1985 para sa new denomination series (NDS.)
Enot nang nagpatanid an bangko sentral na kun magpalyar na makaabot sa nasambitan na deadline sa Hunyo 30, dae na aakuon na pambakal nin ano man na goods and services an mga lumang serye nin kwarta.
