LEGAZPI CITY – Puga-puga na an pigsasagibong preparasyon kan opisyales kan Barangay Matanag, Legazpi City mapadapit sa saindang lakdang enkaso maglala pa an sitwasyon kan Bulkang Mayon na presenteng nasa alert level 3 status.
Segun ki Punong Barangay Hilario Atun sa intrevista kan Bombo Radyo Legazpi na nagkondusir na nin pagroronda an saindang mga Barangay Police nganing abisuhan an saindang mga residentes mapadapit sa pagpreparar.
Pagsyerto niya man sa saiyang namamanwaan na dae mahandal huli ta naka-antabay an saindang konseho nganing tulos na magpa-otob nin magkakanigong lakdang ngonian na padagos an pag-aalburuto kan Bulkan.
May ipigdesignar na man siyang mga pick-up points nganing magin organisado an pagsasagibo ninda nin evacuation efforts asin malikayan an pag-panic.
Piglalaoman kan opisyal na maaapektaran an labi 700 nindang mga residentes kapag i-extend na an danger zone sagkod sa 7KM sagkod 8KM.
Padagos man an pagguno nindang datus nganing maisumite na ini sa City Social Welfare and Development Office para sa marikas na pagbabarewas nin tabang asistensya mantang naglalaom man siya na dae na maglala an sitwasyon kan Bulkan.
Pagirumdom man ni Atun sa saiyang mga residentes na may omahan sa laog kan 6KM permanent danger zone na makipagkoordinar sa saindang ofisina nganing tugutan sinda kan mga kapulisan na maglaog asin asikasuhon an saindang pananom asin atamang hayop.
