Pigpapahanda na ni Senate President Francis “Chiz” Escudero an mga opisina sa Senado para sa impeachment trial laban ki Vice President Sara Duterte.
Sa Direktiba ni Escudero sa paagi kan Special Order No. 2025-015 ipigsugo an Kalihim kan Senado bilang Clerk of Court alinsunod sa Rules of Procedures kan Impeachment Trials.
Trabaho kan Clerk of Court na mag-asiste sa Presiding Officers sa pangangasiwa kan impeachment court.
Trabaho man kaining pamahalaan an non-judicial functions kan impeachment court — kairiba an pag-record asin pag-report kan mga paglilitis, pagmamantenir kan court records, paghahanda nin mga summons, court calendar asin iba pa.
Ipigsugo man an Senate Legal Counsel na magtindog bilang Deputy Clerk kun saen mandato kaini na mag-draft asin maghanda nin mga mga subpoenas, writs, summons, orders, resolutions, decisions, asin iba pang legal instruments.
Afuera sa Senate Legal Counsel, ipigsugo man an Deputy Secretary for Legislation na magtindog bilang Deputy Clerk kun saen trabaho kaini na mag-draft nin impeachment court resolutions, transcripts asin journals kan paglilitis.
Mantang an trabaho man kan Senate sergeant-at-arms na magsunad nin summons, subpoenas asin iba pang legal processes sa sugo kan Presiding Officer o kan Clerk of Court.
An kasuguang ini magkakabisa hanggang sa pagtapos kan impeachment trial laban ki Bise Presidente Sara Duterte afuera kun ini babawion o maamyendaran.
