LEGAZPI CITY – Ipigkondusir kan Commission on Election Albay asin Commission on Election Legazpi an Operation Baklas katakod kan paparaning 2025 National, Local and BARMM Election.
Magigirumduman na ngonian kayang aldaw an pagpopoon kan campaign period para sa mga madalagan sa national position.
Segun ki Comelec Legazpi Supervisor Atty. Connie Del Castillo sa intrevista kan Bombo Radyo Legazpi na nagpoon sinda kasubagong alas otso nin pagkaaga asin dakol sindang nabaklas na mga illegal campaign materials kan mga national candidate sa primerong aldaw kan saindang paglilibot.
Pigtaram pa kaini na pwede lang sinda magbugtak nin mga campaign materials sa mga designated common poster areas, private property na may consent kan may kagsadiri, asin dapat 2×3 feet lang an size kan poster.
Ano man suboot an mga dae nasunod sa mga naunambitang rekisitos na mga campaign materials an babaklason ninda.
Piglinaw man ni Atty. Castillo na wara pa man sindang jurisdiction nganing magtangkas kan mga campaign materials kan mga aspirante sa local position nin huli sa bulan pa nin Marso nagpopoon an karampanyahan kan mga ini.
Kadaklan sa mga nakolekta nindang poster iyo an mga nakabugtak sa mga pampublikong lugar arug kan street light, poste kan kuryente, asin mga nakakabit sa puno.
