LEGAZPI CITY- Pigkakarkulong nasa 95% hasta 98% na an preparasyon kan provincia kan Albay para sa Palarong Panlalawigan 2025.
Segun ki Albay Schools Division Office spokesperson Froilan Tena sa intrevista kan Bombo Radyo Legazpi na handa na an mga playing venues asin mga ekipahe na gagamiton kan mga atleta.
Napag-araman na pigkakarkulong nasa poco mas o menos 2,000 na mga atleta an magraralaban sa manlain lain na sporting events.
Sa ibong kaini, sinabi kan opisyal na dae magagamit an Olympic size swimming pool sa provincial sports complex huli sa pag-kwestyon sa technicalities kaini.
Segun ki Tena na bako man sukol para sa swimming competition an nasabing pool kundi para ini sa diving huli sa rarom na nasa 6 feet.
Paliwanag kan opisyal na bako salbado an siring na rarom kan pool para sa mga kaakian.
Sa presente, naghahanap na nin alternatibong venue para sa swimming kun sain pigsasapinal na sana an venue.
