LEGAZPI CITY-Napag-araman na haros dai makaagi an nagkapirang oil asin gas shipping sa ‘Strait of Hormuz’, mantang matindi an tensyon sa rehiyon kun sain mas pinahigot kan Iran an mga banta laban sa mga barko digdi.
An Strait of Hormuz, saro sa pinaka-importanteng agihan na konektado sa oil-rich Persian Gulf sa open sea.
Basado sa ship-tracking data, nagkapira sa mga barko an naghale sa nasabing waterway kansuudma, Marso 1, asin wara suboot nin nakaka-agi.
Susog sa mga report, na sarong sadit na oil tanker an pinatawan nin sanctioned kan Estados Unidos huli sa pagtabang sa Iran sa pag-export kan fuel, na kalaunan tinarget sa hilagang baybayon kan Oman, alagad bako malinaw kun sisay an nasa likod kan pag-atake.
Sinabi ni Mohsen Rezaei, miyembro kan Expediency Discernment Council na pinayuhan niya an supreme leader kan Iran, sa state television na “no American ship is allowed to enter the Persian Gulf.”
Nagkapirang mga barko man an nag-report na basado sa sarong radio broadcast hale sa Iranian navy, ipinagbabawal na an pag-agi sa Strait, maski wara pang opisyal na anunsyo hale sa gobierno Iran.
Kabale sa mga shipping giant na nagsuspinde kan biyahe, iyo an German container liner na Hapag-Lloyd AG, CMA CGM SA kan France, Nippon Yusen KK kan Japan, mga barko kan Estados Unidos, UKMTO asin an Joint Maritime Information Center.
Pigkokonsidera an Strait of Hormuz bilang saro sa pinaka-importanteng chokepoint sa energy market huli sa pigkakarkulong seaborne oil asin liquefied natural gas (LNG) sa bilog na kinaban na nag-aagi digdi sa urualdaw.
