LEGAZPI CITY – Puminakol na sa poco mas o menos 15,000 an nadanyaran kan epekto kan warang patod na pag-uuran na namamatean sa bilog na rehiyon Bicol susog sa inisyal na datos kan Office of the Civil Defense Region 5.
Segun ki OCD Bicol Spokesperson Gremil Naz sa intrevista kan Bombo Radyo Legazpi na katampad ini kan 64,795 na mga indibidwal na nagtetenir sa evacuation center asin sa mga haralangkaw na kaharongan.
May mga nairehistro man na 4 pagbabaha sa mga barangay sa Camarines sur asin 11 sa Sorsogon mantang pig-aaram pa kun nagsubside na an mga ini hasta sa ngunyan o dae pa.
Saro pa sana suboot na casualty an saindang nairehistro kun sain nangyari ini sa banwaan kan Irosin, Sorsogon asin pigbeberipika pa an mga ibang report mapadapit sa pagkagadan nin huli sa mga pagbabaha sa mga nakalihis na magdamlag.
Pigataram pa kan opisyal na susog sa saindang inisyal na datos, wara pa sindang nareresibi nin incident report mapadapit sa mga nangyaring rain induced landslide dawa na may nahihiling na ining mga post sa social media.
Pighahalat suboot kan saindang ahensya an mga isusumiter na mga report kan mga Local Disaster Risk Reduction and Management Office nganing maisabay sa saindang opisyal na datos.
Wara man na nairehistrong lahar flow incident sa palibot kan bulkan mayon sa ibong kan mga pag-uuran na namatean sa provincia kan Albay.
Pagsyerto ni Naz na mantinidong naka blue alert pa man giraray an saindang operation center nin huli ta kaiba sa saindang pigmomonitor an sitwasyon kan bulkan mayon afuera sa mga pag-uuran na namamatean sa rehiyon.
