LEGAZPI CITY – Pighayag kan Polangui Emergency Medical Service – Quick Response Team na uminabot na sa 358 an nairehistrong road accident na saindang narespondehan sa saindang banwaan para sa bulan kan Enero hasta Mayo sa presenteng taon.
Segun sa supervisor kan grupo na si Christopher Encisa sa intrevista kan Bombo Radyo Legazpi na kun pagbabasehan an datos kompara kan parehong peryodo kan nakaaging taon an mahihiling na nagkaigwa nin labing pagtaas.
Kadaklan sa mga narerespondehan nindang aksidente sa banwaan an nangyayari sa kahalabaan kan maharlika highway poon sa Barangay Matacon hasta sa Barangay Ubaliw.
Poon kan huring semana man suboot kan Mayo hasta sa mga primerong aldaw kan Hunyo an sunod-sunod na an mga nangyaring mayor na aksidente na nangyari sa nasabing tinampo sa saindang lugar.
Pigtaram pa kan opisyal na makakatabang man sa imbestigasyon kan mga otoridad an mga footage na hale sa mga CCTV asin an nagviral sa social media na dashcam footage kan nangyaring banggaan sa Barangay Ubaliw kan nakaaging aldaw.
Huli sa pagdakol kan numero kan mga aksidente, nagdugang na sinda nin mga dugang na ilaw nganing magkaigwa nin visibility an mga driver partikular na sa mga darakulang tinampo sa saindang banwaan.
Kaipuhan suboot an maray na kondisyon kan mga behikulo asin mga driver nganing malikayan an pagka-imbwelto sa mga aksidente sa tinampo.
Pigdoon pa ni Ensica na sa presente nagkaigwa na nin police visibility sa mga kakalsadahan asin sa mga highway sa Polangui nganing dae na magporbar an mga driver sa marikas na pagpapadalagan kan saindang mga behikulo.
